الحب مثل الحروب ابها خساير عظام

الحب ياجاهلٍ بالحب شوق وغـرام
عواطفٍ وسط روحك صار مسكانها
الحب ماهوب كلمة مثل باق الكلام
الحب يسكن قلوب ابعـز ريعانهـا
الحب كم واحدن صابه برمي السهام
الحب كلمة كبيرة باسـم عنوانهـا
الحب كم واحدن ساقه بجر الخطـام
كلمة لها وقـع بالعالـم وبازمانهـا
الحب ياصل ترا حتى قلوب الحمـام
من عشقها بالسما تكفخ بجنحانهـا
الحب ياناس ماهو دوم برد وسـلام
كلمة كثير العرب يعيـش نيرانهـا
الحب لا زاد حده صار عشق وهيام
وتصير نفسك تعيش العمر بجنانهـا
الحب فالقلب يبنى مثل بنـي الخيـام
الصبر مخطر وكثر الشوق عمدانهـا
الحب ماهوب سلعة ياعرب تنتسـام
الحب كلمـة بهيضـة دوم باثمانهـا
الحب فيه الحلال وفيه أيضـاً حـرام
ونفسك عن اللي محرّم جوّد اعنانهـا
الحب يزدان بالعفـة وبالاحتشـام
كالبسمة اللي تزين ابلمعـة اسنانهـا
الحب من دون حشمة ودك انّه عدام
مثل السفينة ليا مـن طـاح ربانهـا
أو مثل عفرا جميلة لولا عيب السنام
ان كان غليت غلا مارخصت اثمانها
حبٍ على غير مبدا بعد صحوه ينـام
وناسه ترا ياعرب سريـع نسيانهـا
وحبٍ على عزّ يبقى دوم في كل عام
ناسه مع الوقت ماتنـوي بهجرانهـا
الحب كلمة لها عشاق دوم انقسـام
شتان مابيـن صاحيهـا وجربانهـا
الحب مثل الحروب ابها خساير عظام
وابها غنايم بعد في وسـط ميدانهـا
وقبل انهي القاف انا بختم بقول السلام
سلام ياللي قرا الصفحـة بقيفانهـا