قصايد من اختياري لكمـ ...

قصايد من اختياري لكمـ ...

--------------------------------------------------------------------------------

* يقول الامير: خالد الفيصل دايم السيف .



الناس تفنى والمباني والاملاك **** والقول يبقى والخبر للتوالي

الشعر معنى حكمته بعد الادراك **** وما كل يلمع على النور غالي

والشعر صور شاعر فيه تلقاك **** اما لبس لك جوخ ولا سمالي

* ويقول: بركات الشريف:

احفظ حلال(ن) لك عن الناس يغنيك **** اللي الى بان الخلل فيك يرفاك
اجعل دروب المرجله من معانيك **** واحذر تمايل عن درجها بمرقاك
أدب ولدك كان تبغيه يشفيك **** واستسفعه من بعد مرباه يالاك


* وهذا الشاعر: سليمان بن شريم:

وربعك الى بان الخلل فيك عافوك **** اقرب قريب لك من الناس يشناك
ان كثر مالك اصدقولك وطاعوك **** وان قل ما بيدك شانت حلاياك
لو تطلب الماء عندهم كان ما اسقوك **** ابعد مزارك عن وطنهم ومرباك
وان طاب حظك اصدقولك وحبوك **** وان بار كل ما يبي غير فرقاك
وهراجة المجلس الى جيت وروك **** منازل تطرب نظريك بدنياك
والى قضوا منك اللوازم وخلوك **** تفرقوا وانت احتمل لحل ما جاك
كنك سراج البيت للنور شبوك **** واللي انقضى اللازام حد الربع طفاك

الى ان قال:

واصحى لخلان الرخا لو تغالوك **** اعرف ترى اطيبهم الى احتجت يجفاك
كنك خوي مقيط دهووك واغووك **** وحقك عطاك رشاك واقفى وخلاك
واحذر عن العيلة ترى الحق مدروك **** مثل العمل يدركك ما منه فكاك
وان كان عدوانك على الضيق حدوك **** فاخصم طلابتهم بعجفاك وقداك
وان كان هم لمشرف الحق ما شوك **** ناظر مطاليع الفرج قبل مبداك
واحلم على الجاهل ترى الحلم مبروك **** وقم للضعيف اللي من الضيم ينخاك
وادمح خطا جيران بيتك الى اوذوك **** ترى القصير وحرمة الجار بحماك
وقم للضيوف اللي لفولك وضافوك **** اغلا كرامتهم حجاجك وبشراك

* يقول الشاعر: عبدالله بن صقيه التميمي:

ساس الردي لابد مبناه ينهال ****ولد الردي صاحبي تحطه بطانه
تلقاه وقت الضيق لاصكك الجال **** الصفر لا يغريك زين لمعانه
ترى الذهب من صافي جنيه واريال **** ما يختلف يا ذيب طيلة زمانه
بستان غيرك لوبه الوان واشكال **** ما تنتفع من خوخه وبردقانه
ما ينفعك ما فيه لو بالثمر مال **** لاصار بالغدراء جداره مخانه

ويقول ايضا:

احرص عن الزلات في كل الاحوال **** لا تنخدع باللي يعلج اللبانه
ما يفتري ويشين الناس رجال **** راع الحكي بالناس خله وشانه
عليك باللي بالمهمات سردال **** ليث مثل من حط قوسه رهانه
انت وانا نبعد عن القيل والقال **** كم واحدٍ يا ذيب ضره لسانه

* ويقول غازي بن دخيل الله بن عون:

الرفقه اللي مالها ساس ووصول **** اتلى تلياها تروح بسهوله
مثل الذرور اللي على راس غرمول **** اول مهب يعترض له يزوله
والفعل ما يطلع على مستوى القول **** يقول قول ما يطبق فعوله
والفرق في الافعال, ماهوب في الزول **** والا ترى اطيب ما من الثور زوله
لو غرّهم زوله, وحطوه مسئول **** صاروا مثل راع الغنم ومخيوله
ثوب على جسم على شبه مخيول **** ودايعه يفرسهن الذيب حوله


* يقول: عبدالعزيز الحسن:

بعض البشر مثل النجوم المراهيش **** انوارهم تزهي بالافراح بشه
افكارهم ري العقول المعاطيش **** في الدين والدنيا للاخيار هشه
وبعض البشر عقله من التبن والخيش **** لوزان شكله داخل الراس عشه

* وقال تركي بن حميد

ترك عشير عشرته يوم او دون **** ثم يبدل بك عشير وينساك
شف لك قطامي على السد مامون **** درع القفا ما ينهض الراس لحذاك
اللي الى اوحى الناس فيكم يهرجون **** حامي على عرضك ويدمح خطياك


* ويقول: عبدالله التميمي:

الشور ما ينفع قلوب المهابيل **** كالزند وان حرك تطاير شراره
لو تأمره بالعدل يعرض على الميل **** يبتل على رايه بربح وخساره
والطبع ما ينزال غيره بتبديل **** مثل الجدي مرساه ليله نهاره
والحنظله لوهي على شاطي النيل **** زادت مرارتها القديمه مرارة


* يقول راشد الخلاوي:

لا تستشير الا صديق يودك **** في الله صافي السر مامون عاقبه
وترى شور ما لا يستشيرونه الملا **** شمعه نهار في ضيا الشمس دايبه
وأرى النصايح في البرايا فضايح **** وكم ناصح اضحى له الناس عايبه


* ويقول محمد عبدالله القاضي:

تكلفك بامر ما يخصك جهالة **** وتبعدك عما كان يلزمك له قافي
ولا تصافي كود حيد صميدع **** غيور على الصاحب نصوح وميلافي
ولا تلوم النفس في جاري القضا **** مالك عن المقسوم يالعبد مكافي
يا شرهل المعروف منك بتواضع **** وهل الشر باشرهم بشر وتستافي

* ويقول غازي بن مهنا الشيباني:

ما طار وقع من مطيره ولو حام **** والزود مثل النقص ينقص ولو زاد
دنيا تغر الناس في طول الاحلام **** ولابد تاصل شرها بين الاجواد
ياماشي بالدرب مسرى ومجهام **** لابد من عقب المراويح معواد
احد قضى زامه واحد يمسك الزام **** واللي صدر منها يجي غيره اوراد

* كذلك يقول: محمد بن عايض بن هادي الحباني:

من رابع الخايب سكن دوم واياه **** لبس الدناسه عقب لبس الجدادي
ومن طاوع الشيطان في دينه اغواه **** يصبح غريق بين الامواج غادي
ومن عاشر الطيب ترى الطيب شرواه **** وبالطيب يرقى نايفات المبادي
خلك مع الطيب وممشاك ممشاه **** ورافق على الربع القروم العوادي
عز الفتى دينه وسلمه ومرباه **** وربعه عضوده عند قدح الزنادي
تاقف معه وبقدر الامكان تحماه **** لا صار باطراف الحبال انعقادي

* ويقول محمد بن عقيل السويلمي:

اضرب طريق الخير واسلك مسيره **** ولا تلتفت للناس عوجاه واقداه
ولو طال عمرك عارف وش مصيره **** ازبن ولي العرش واتعب على رضاه
وأد الفروض الاوله والاخيرة **** واضف لهن مخافة الله ورجواه

* ويقول حمد بن هادي المسردي القحطاني:

من كثر ماله ساروا الناس برضاه **** ولو كان ناقص قالوا الناس وافي
ومن قل ما بيده ترى الناس تشناه **** ولو كان يسقيهم عسل قنط صافي
فالمال كم ساس طمان وعلاه **** والفقر كم حطم روابع سنافي
لاشك ما للعبد عن حكم مولاه **** من خير ولا شر ولا عوافي

* يقول محسن بن ناصر المري:

قوموا بدين الله ورزوا شعاره **** واخشوا نهار فيه تخطيف الابصار
دنياك مرجعها الفنا والقشاره **** لا تامن الدنيا ترى الوقت غدار
لابد من قبر وحيش جداره **** من مات ياالمسكين خلي على الدار


* وهذا الشاعر مرشد بن سعد البذال:

لولا الردي ما صار للطيب سمعه **** لاشك لهذا ضد ذاك يصير
والناس مثل الماء غدير ومالح **** هذا ملاح وذا زلال غدير
والاجواد قربتهم تبيض وجودهم **** تنفع ولا من قربهم تأثير
والاشرار نفعتهم مكافاة شرهم **** والا ترى قرب اللئيم خطير
الرجل عقل ومرجله وديانه **** بلاشك راعي ها الثلاث ظهير

* وهذا علي المفضي يقول:

من طاول الدمعه تكدر شرابه **** والغت مرارة دمعته كل حالي
وافنى عنا دنياه زهرة شبابه **** لو كان من بين الخلايق مثالي
واللي يبي ياقف لوقته يجابه **** ينهد حيله,, والزمن ما يبالي


* ويقول الشاعر عبدالله العلي الحرير

الى بغيت اتحط كلش على البال **** غديت صقار بساقه هداده
تغثك الدنيا ولا ادركت به حال **** مثل البعير الى تقلد اشداده

* ويقول حامد بن مايقه الحبابي:

تخير اذا رافقت من الناس عارف **** رجل اذا شان الزمان يطيب
رفيق على عسر الليالي ويسرها **** كما الزرع,, في وقت الدهور خصيب
امين يحفظ السر عن ساير الملا **** حفيظ على ما في الضمير قطيب

* ونختتم رحلتنا هذه مع أبيات للشاعر محمد بن احمد بن محمد السديري يقول:

قصر يذلك لا تقابل مبانيه **** خله عسى شامخ طويله هدامي
خله عسى ما صاب اغادير يفنيه **** يودع منازله الطويله رجامي
لو زان مدخاله وطالت حواميه **** شيد على الخيبه قليل الرحامي
وحي يوريك المذله وتغليه **** انا اشهد انك ميت القلب عامي
من لا يودك لا توده وترجيه **** ارفع مقامك يا عزيز المقامي
ارفع مقامك عن عدوك وتوذيه **** ويلحقك من تركة رفيقك ملامي
حق الرفيق وواجبه لا تخليه **** يلزمك مثل الوالدين الحشامي
اختر عزيز الجار والحق يعطيه **** شبل على هرج يقوله يحامي
ومن قارب الاجرب بالامراض يعديه **** عدواه تسطي باللحم والعظامي
درب السلامه بينات مماشيه **** ودرب العطب يرث عليك اللكامي

* ومن قصيدة أخرى يقول فيها:

لا خاب ظني بالرفيق الموالي **** مالي مشاريه على نايد الناس
لعل قصرٍ ما يجيله اظلالي **** ينهد من عالي مبانيه للساس
لا صار ماهو مدهل للرجالي **** وملجا لمن هو يشتكي الضيم والباس
بحسناك يا منشي حقوق الخيالي **** يا خالق اجناسٍ ويا مفتي اجناس
تجعل مقره دارس العهد بالي **** صحصاح دوٍ دارس ما به اوناس
البوم في تالي هدامه يلالي **** جزاك يا قصر الخنا وكر الادناس
متى تربع دارنا والمقالي **** وتخضر فياض عقب ماهيب يباس
نشوف فيها الديدحان متوالي **** مثل الرعاف بخصر مدقوق الألعاس


* ومن رائعة اخرى يقول السديري:

لا تقرب الأجرب بالامراض يعطبك **** يصير جسمك مثل جسمه عليلي
ممشا الخطا من صافي العقل يسلبك **** ويصير لك يم الرذيله سبيلي
وعن ما رد الانذال نزه مشاربك **** واشرب نظيف لو ورادك طويلي
ولياك تنسى يا ابن الاجواد واجبك **** واللي يروم المجد حمله ثقيلي
يالادمي وان كان كبرت مصايبك **** ازبن على محي البلاد المحيلي
أزبن على رب بعرشه يراقبك **** وناجه وبعد العسر يسره جليلي

مع تحياتي

شكرا جزيلا.



ابوفراس

العفوووووووووووووووووو
ومشكوووووووووووووووور
على المرور

مختارات جمييله وختيره

يسلمووو ياتكووي على هيك مختارات

ثنكس